जुम्लाकी सांसद छिरिङले समाजिक सञ्जालमा पाेस्ट गर्दै ज्ञानेन्द्र शाहीलाई नि:शुल्क इतिहासकाे ट्युसन पढाउने

काठमाडौं । राप्रपा सांसद ज्ञानेन्द्र शाहीलाई जुम्लाबाटै समानुपातिक प्रतिनिधित्व गर्ने माओवादी केन्द्रकी सांसद छिरिङ ल्हामुले इतिहासको निःशुल्क ट्युसन पढाउने प्रस्ताव राखेकी छन् ।

माओवादी सांसद छिरिङले सोमबार वक्तव्य दिँदै ज्ञानेन्द्र शाहीलाई इतिहासको राम्रो ज्ञान नभएको भन्दै नरभूपाल शाहदेखि पारस शाहसम्मको इतिहास निःशुल्क पढाइदिने बताएकी छन् ।

जुम्लाबाट प्रत्यक्ष निर्वाचित सांसद शाही र माओवादीकी समानुपातिक सांसद छिरिङबीच बेला बेलामा संसदभित्रै पनि आरोप प्रत्यारोप चल्ने गरेको छ । शाहीको आलोचना गर्न छिरिङ संसददेखि सामाजिक सञ्जालसम्म कतै चुक्दिनन् ।

उनले आइतबार प्रतिनिधिसभामा एमाले सांसद रघुजी पन्तले ज्ञानेन्द्र शाहीलाई इतिहास पढाएको भन्दै शाहीले अहिले बोकेका ज्ञानेन्द्र शाह राजा बन्ने कतैबाट पनि योग्यता र रोलक्रममा नरहेको दाबी गरेकी छन् ।

यस्तो छ माओवादी सांसदले राप्रपा सांसद शाहीलाई दिएको चुनौती

हिजो संघीय संसदमा माननीय रघुजी पन्तले माननीय ज्ञान बहादुर शाहीलाई इतिहास पढाउनुभयो । मैले पनि माननीय ज्ञानबहादुरलाई अर्को इतिहासको पनि अवगत गराउन चाहन्छु । तत्कालीन राजा महेन्द्र शाहको जेठो छोरो रवीन्द्र शाह राजा हुनुपर्नेमा दरवारियाले रोलक्रम मिचेर जबरजस्ती वीरेन्द्र शाहलाई राजा बनाए । रवीन्द्रलाई एकजना अविवाहित महिला गीता गुरुङबाट जन्मेको पहिलो सन्तान भएकै कारण अपहेलित गरेर राजदरबार बाहिर राखिएको थियो । शाहकालीन इतिहास वर्ग र जातमा विभेद गर्ने नस्लीय चिन्तनले ग्रस्त सामन्ती सोचको जड थियो भन्ने यहाँ बाट पुष्टि हुन्छ । माननीय ज्ञानबहादुरले अहिले बोकेको अहिलेको पूर्वराजा कहीँ कतैबाट राजा होइनन् ।

माननीय ज्ञानबहादुर शाही बतासजस्तै बनेर इतिहास नबुझी फोकटमा  व्यापारी ज्ञानेन्द्रको खुट्टा ढोगिरहेका छन् ।

कि भन्नु परो ‘जसको सीता खाइ उसको गीता गाइ’ भनेर, होइन भने तपाईँले अन्धकारमा हुनुहुन्छ माननीय ज्ञानबहादुर ! उल्टो खोलो फर्काउन हिँडेका हाम्रा जुम्लाला माननीय ज्ञानबहादुरले सुख्खा खोलो बोक्नु कति अज्ञानी बन्नु भएको हँ ?

तपाईँले बोक्ने नै हो भने महेन्द्रको जेठो सन्तान बोक्नुस् । नभए उनको पनि जेठो सन्तान बोक्नुस् । भरिया नै बन्ने हो भने सक्कली मालिकको बन्नुस् । रोलक्रम मिचेर राजा भएका वीरेन्द्रको परिवार मारिएलगत्तै हत्त न पत्त श्रीपेच खोसेर लगाएका ज्ञानेन्द्र त नक्कली राजा हुन् । शाह वंशको इतिहासले त्यही भन्छ । राजावादीले आफ्नै राजामाथि विभेद गर्ने । नजाने इतिहास पढ्न आउनुहोस् । म तपाईँलाई नरभूपालदेखि पारससम्मको इतिहास नि:शुल्क पढाइदिन्छु । यो तपाईँको लागि आवश्यक छ । तपाईँ मेरै जिल्लाको भाइ भएकाले यो अफर दिएको नत्र अन्य राजावादीलाई शुल्क लाग्छ ।