चल्सीले फिफा क्लब विश्वकपको उपाधि जित्यो

काठमाडौं : चेल्सीले पेरिस सेन्ट–जर्मेन (पीएसजी)लाई ३–० ले पराजित गर्दै फिफा क्लब विश्वकपको उपाधि जितेको छ। खेलमा अमेरिकी राष्ट्रपति डोनाल्ड ट्रम्पको उपस्थितिमा पुरस्कार वितरण गरिएको हो। 

न्यू जर्सीको ईस्ट रदरफोर्डस्थित मेटलाइफ स्टेडियममा भएको फाइनल खेलमा खेलाडीबीच झगडा भएको थियो। पीएसजीका प्रशिक्षक लुइस एनरिके र गोलकिपर जियानलुइगी डोनारुम्माले चेल्सीका फरवार्ड जोआउ पेड्रोलाई धकेलेर लडाउन पुगे।  झगडा ट्रम्प फिफा अध्यक्ष जियानी इन्फान्टिनोसँगै ट्रफी र पदक वितरण गर्न आफ्नो बक्सबाट मञ्चतर्फ आउन लागेको समयमा सुरु भयो। 

चेल्सीका लागि कोल पाल्मरले दुई गोल र पेड्रोले एक गोल गरे। खेलको दोस्रो हाफमा पीएसजीका  जोआउ नेभेसले चेल्सीका मार्क कुकुरेल्लालाई कपाल तानेर लडाउन खोजेपछि रातो कार्ड पाए। खेलभरि कुल ६ वटा पहेँलो कार्ड देखाइयो।

एनरिकेले मैदानको बीच भागमा पेड्रोलाई घाँटीतिर धकेलेको देखिन्छ। त्यसपछि डोनारुम्मा आएर पेड्रोलाई थप धकेले। यद्यपि झगडाको सुरुवात किन भयो भन्ने स्पष्ट छैन।

झगडा चर्किनुअघि खेलाडी र प्रशिक्षकहरूले स्थिति नियन्त्रणमा ल्याए। त्यसपछि ट्रफी वितरण समारोह सुरु भयो।