डिम्बकाे अवैध काराेबार गर्ने गिराेह पक्राउ : निःसन्तान दम्पतीबाट २० लाखसम्म असुली

काठमाडौँ । अवैधरुपमा किशोरीहरूबाट डिम्ब सङ्कलन गरेर बच्चा जन्माउने प्रयोजनका लागि निःसन्तान दम्पतीलाई बेचबिखन गरेको आरोपमा काठमाडौँका दुई वटा क्लिनिकमाथि प्रहरीले अनुसन्धान अघि बढाएको छ । 

बबरमहलमा सञ्चालित होप फर्टिलिटी एन्ड डायग्नोस्टिक प्रालि र महाराजगन्जमा सञ्चालित एन्जेल फर्टिलिटी क्लिनिकमाथि अनुसन्धान सुरु गरिएको केन्द्रीय अनुसन्धान ब्युरो (सीआईबी)का एसएसपी होविन्द्र बोगटीले नेपालभाइरलाई बताए ।

ती क्लिनिकले १८ वर्षमुनिका किशोरीहरूबाट डिम्ब सङ्कलन गर्ने र निःसन्तान महिलाहरूलाई ट्रान्सफर गर्ने गरेको भेटिएको छ । ब्युरोले होप फर्टिलिटी एन्ड डायग्नोस्टिक प्रालिका तीन चिकित्सकसहित पाँच जनालाई पक्राउ गरेको जनाएको छ । पक्राउ पर्नेमा डा. असिम अधिकारी, डा. स्वस्ती शर्मा, डा. मलिना चौधरी, जस्टिना प्रधान र अलिसा ओली थिए । तर, काठमाडौँ जिल्ला अदालतले उनीहरूलाई ‘थुना बाहिर राखेर अनुसन्धान गर्नू’ भनेपछि आरोपीहरूलाई हाजिर जमानीमा छाडिएको एसएसपी बोगटीले जानकारी दिए ।

एन्जेल फर्टिलिटी क्लिनिकबाट पक्राउ परेका एक जना आरोपीलाई पनि हाजिर जमानीमा राखेर प्रहरीले अनुसन्धान गरिरहेको छ ।

होप फर्टिलिटी एन्ड डायग्नोस्टिक प्रालिमा एजेन्टको रूपमा कार्यरत २० वर्षीया जस्टिना प्रधानले रजस्वला भएको तेस्रो दिनका किशोरीहरूलाई सम्पर्कमा ल्याउने गर्थिन् । त्यस्ता किशोरीहरूलाई बबरमहलमा लगेर १० दिनसम्म राख्ने र नाइटो वरपर १० वटा सिरिन्ज लगाउने गरिन्थ्यो । १३ औँ दिनमा बेहोस बनाएर ओभरीमा जम्मा भएको डिम्ब निकालेर निःसन्तानहरुलाई ट्रान्सफर गर्ने गरेको प्रहरीको अनुसन्धान निष्कर्ष छ ।

डिम्ब सङ्कलन गरेबापत किशोरीलाई १५ हजारसम्म दिने र एजेन्टले ४० हजार लिने गरेको भेटिएको छ । निःसन्तान दम्पतीहरुले क्लिनिक सञ्चालकहरूलाई २० लाखसम्म लिने गरेको अनुसन्धानमा संलग्न प्रहरी अधिकृतहरू बताउँछन् ।

क्लिनिक सञ्चालकहरूले कृत्रिम गर्भधारण (आईभिएफ) प्रविधिको नाममा कानुन विपरीत किशोरीहरूको डिम्ब निकालेर बेचेका हुन् ।

 त्यसरी डिम्ब निकालेका किशोरीहरूमा दुब्लाउने र खाना अरुचिको समस्या देखिएपछि अभिभावकले ब्युरोमा उजुरी गरेका थिए । अहिलेसम्म ब्युरोमा दुई वटा उजुरी दर्ता भएको छ । प्रहरीले आरोपीहरू विरुद्ध बालबालिका विरुद्धको कसुरमा जाहेरी दर्ता गरेर अनुसन्धान गरिरहेको छ ।