By नेपाल भाइरल 
भेनिस । कला र विज्ञानकाे संयाेजन परियोजना, “ए स्टडी इन आइसोलेसन,” भेनिस वास्तुकला बिएनालेमा जुलाई २६, २०२५ मा प्रिमियर हुने भएको छ। यसले एनालग अन्तरिक्ष परियोजनालाई प्रत्यक्षरुपमा प्रदर्शन गरी शृङ्खलाबद्व तवरबाट मनोवैज्ञानिक , काल्पनिक वास्तुकला, अन्तरिक्षकाे बसाइँ अनुभव मानव जीवनको लागि केकस्ता रहेको छ भन्ने बारे अन्वेषण गर्नेछ। यस परियोजनाको मुख्य लक्ष्य अन्तरिक्ष अन्वेषणको बहसमा विविध विश्वव्यापी आवाजहरूलाई एकीकृत गर्नु र परम्परागत पश्चिमी-केन्द्रित कलालाई चुनौती दिनु हुनेछ ।
सर्जक यान स्वेरकाैभस्की (इन्स्टिट्युट बी६१) ले नेपालका कलाकार अमृत कार्की, आमाजुमी, र लुनेरेस रिसर्च सेन्टरसँगको सहकार्यमा परिकल्पना गरेको “ए स्टडी इन आइसोलेसन” पोल्याण्डको पिलामा रहेको लुनेरेस एनालगमा गरिएको कृत्रिम काल्पनिक अन्तरिक्ष बसाइँ अनुभवबाट प्रेरित हुनेछ ।
कलाकार आमाजुमी र अमृत कार्कीले अध्ययन अनुभवका निम्ति केही समय काल्पनिक कृत्रिम अन्तरिक्षमा गुप्तवास जीवन बिताएका थिए । उक्त गुप्तावासमा बस्दा समय, विचार र शरीरलाई कसरी परिवर्तन भयो भन्ने कुराको परीक्षण गर्न आगामी कार्यक्रममा आमाजुमी र अमृतले कलात्मक प्रस्तुति प्रदर्शनीमा देखाउने छन् ।
भेनिसमा, कलाकारहरुले आफ्ना अन्तरिक्ष अनुभवहरू मार्मिक ढङ्गले प्रदर्शनीमा प्रस्तुत गर्नेछन् । नेपाली मुलकी याक्थुङ आदिवासी कलाकार आमाजुमीले “अगेन्स्ट द डाइङ अफ द लाइट” नामक २० मिनेटको प्रस्तुति दिनेछिन्, जसमा उनले अन्तरिक्षमा आफूले आभास गरेका अनुभवलाई काव्यिक शैलीमा प्रस्तुत गर्नेछिन् । कलाकार आमाजुमीकाे लागि यो एक ऐतिहासिक क्षण हुनेछ । किनकि उनी एनालग अन्तरिक्ष कार्यक्रममा भाग लिने पहिलो याक्थुङ आदिवासी कलाकार भएकी छन् । अमृत कार्कीले पनि आफ्नो अनुभवलाई पफर्मेन्स कलाकाे माध्यमबाट अन्तरिक्षकाे बसाइँ अनुभवहरू कार्यक्रममा साझा गर्नेछन्।
जुलाई २६, २०२५ मा साँझ ५–७ बजे द युनिभर्स पभिलियन (कन्नारेचाे ५०६३, ३०१२१ भेनिस) मा हुने प्रिमियर कार्यक्रममा प्रदर्शनकाे अलावा लेसेक ओजाेकाेस्की, अन्तरिक्ष उद्यमी काेलाेडिया क्यासल, अमृत कार्की र आमाजुमी, र यान स्वेरभाैस्कीसहितको सार्वजनिक छलफलमा समेत सहभागिता जनाउने छन् ।
“ए स्टडी इन आइसोलेसन” ले एक्लाेपनलाई काल्पनिक शक्तिको रूपमा परिभाषित गर्नेछ । जसले भविष्यमा संसारभर निर्माण हुने विविध कलालाई स्थान दिनेछ । भेनिसपछि, इन्स्टिट्युट बी६१ द्वारा निर्मित यो परियोजनाले समावेशीकरण, अन्तरिक्षको भविष्य, र कला तथा विज्ञानमा उपनिवेशवादपछिका कथाहरूकाे संवादलाई निरन्तरता दिनेछ । निकट भविष्यमा नेपालमा पनि यस्ता संस्करणहरू आयोजना हुनेछन् ।
