एउटा युद्व लड्ने मन छ

मिम बहादुर परियार

पर क्षितिजबाट याेद्वा

विजयकाे बिगुल फुक्दै

झुकेको शिर ठाडो पार्दै

च्यात्तिएको मन समाहल्दै

भाँडिएकाे एकता मिलाउँदै

ऊ उभिएको छ बाेलिरहेकाे छ सुनाइरहेकाे छ ।

एउटा अन्तिम युद्ध लड्ने मन छ

हाँसीहाँसी सहिद हुने मन छ

यी असमानता हीनता चिर्ने मन छ

विभेद भयत्रास जित्ने मन छ

शिर ठाडो , छाती चाैडा पारेर हिड्ने मन छ

हात साथ पाएर एक हुने मन छ

सँगसँगै विभेद , अहंकार ,मार्ने मन छ

जलाउने बगाउने खाडलमा पुर्ने मन छ ।

मैले भागेकाे सहेकाे देखेको

जातकाे खेल ,सम्बन्धकाे खेल

भित्र बाहिरको जालझेल 

कथित संरचनाको जालाे

नक्कली सद्भावकाे मुकुट

संरचनात्मक अन्धताकाे कालाे बादल

समानताको बारुदले ध्वस्त पार्ने मन छ।

यी असमानता विभेदलाई

अणु बमले  सिध्याउने मन छ

ताकि कहिल्यै याे धर्तीमा नदेखियाेस्

मैले जस्तै कलिला काेपिलाले भाेग्न नपराेस्

पर बस्न नपराेस् , ढाेका बन्द नहाेस्

बहिष्कृत हुनु नपराेस्

जातकै कारण कहिल्यै रुन नपराेस्

प्रेमिल मनकाे हत्या जातले नगराेस् ।

मित्रता भाईचारा एकताको टाकुरामा उभिएर

यी सामान्ति अतिवादीकाे शेष

छट्पटिएकाे, चिच्याएकाे ,माफी मागेको

तमाम अपराध स्विकार्दै धिकार्दै

पुकारदैं, गल्ती गर्याैं लैजाउँ भनेको

चीत्कार ग्लानी सुन्ने हेर्ने र सँगसँगै

अस्तित्व समाप्त भएको हेर्न मन छ ।

याे लडाइँ अन्तिम बनाउने मन छ

कालाे इतिहास भएको पढ्ने मन छ

कुरीति कुसंस्कार कुविचार

अतिवाद जलाएर आगाे ताप्ने मन छ

जातिवाद , नातावाद , कृपावादलाई

आरनमा सदाको लागि पगाल्ने मन छ

फाटिएका मनलाई एकताको धागाेले सिलाउने मन छ।

हाे एउटा यस्तो युद्व जित्ने मन छ

कालजयी युद्ध लड्ने मन छ

जहाँ गरिब मजदुरको जित हाेस्

समाजवादकाे जित हाेस्

मानवताको जित हाेस्

समानता समता सामाजिक स्वतन्त्रता जित हाेस्

देहत्याग गर्नै परे हाँसिहाँसि त्याग्ने मन छ

सबैका मुहारमा हाँसो छर्ने मन छ

मरेर पनि जित्न सकियोस्

बस् एउटा युद्ध लड्ने मन छ ।