गुनासे भेटघाटमा विद्याले आफ्नै गुनासो सुनाइन् मनिषले रविकाे दुख: सुनाए

काठमाडौं । पूर्वराष्ट्रपति विद्यादेवी भण्डारीले एमाले अध्यक्ष केपी शर्मा ओलीले बोली फेरेर आफूलाई पार्टी आउनबाट रोक्न खोजेको गुनासो गरेकी छन् । त्यस्तै रास्वपा सांसद मनिष झाले पार्टी सभापति रवि लामिछानेलाई सरकारले अदालतका नजिर नहेरी दुख दिएको बताए ।

मंगलबार बूढानीलकण्ठको भंगालस्थित भण्डारी निवास पुगेका रास्वपा प्रवक्ता मनिष झासँग उनले उक्त गुनासो गरेकी हुन् ।

आफ्नै वचनबाट पछि हटेर ओलीले एमालेको राजनीतिमा आउन आफूलाई रोकेको गुनासो भण्डारीले गरेकी छन् । तर, उनले आफू नरोकिने बताइन् ।

आफू राजनीतिमा अघि बढिसकेकाले अब पछाडि नफर्कने भन्दै पूर्व एमाले उपाध्यक्ष भण्डारीले आफू एमालेकै राजनीतिबाट अघि बढ्न चाहेको बताइन् ।

प्रधानमन्त्रीसमेत रहेका एमाले अध्यक्ष ओलीले केही अघिसम्म पूर्व राष्ट्रपति राजनीतिमा आउन पाउने, एमालेकै अध्यक्ष बन्न पाउने भनेर सञ्चार माध्यममा अन्तर्वार्ता दिएका थिए ।

तर, गत साउन ५ र ६ गते बसेको पार्टी केन्द्रीय कमिटी बैठकले सचिवालय र स्थायी कमिटीको अनुसार भण्डारीको पार्टी सदस्यता नवीकरण नगर्ने र राजनीतिमा नआइ सबैको सम्मानित भएर बस्न भण्डारीलाई सुझाव दिएको थियो ।